Sabarimala gold plating controversy : ఏళ్ల తరబడి సాగుతున్న వివాదానికి తాత్కాలిక తెరపడింది. శబరిమల అయ్యప్ప స్వామి ఆలయ గర్భగుడి ద్వారపాలక విగ్రహాల నుంచి మాయమైన బంగారు తాపడాల కేసు కీలక మలుపు తిరిగింది. హైకోర్టు ఆదేశాలతో, పునరుద్ధరించిన బంగారు-రాగి తాపడాలను ఆలయంలో తిరిగి ప్రతిష్ఠించారు. ఈ కేసులో ప్రధాన నిందితుడిని అరెస్ట్ చేసిన నేపథ్యంలో, ఈ పరిణామం ప్రాధాన్యత సంతరించుకుంది. అసలు ఈ బంగారం మాయం కథేంటి..?  కోర్టు ఎందుకు జోక్యం చేసుకోవాల్సి వచ్చింది..?

2019లో, శబరిమల గర్భగుడి ముందున్న ద్వారపాలక విగ్రహాల బంగారు పూత పూసిన రాగి తాపడాలను (Gold-plated copper plates) మరమ్మతుల నిమిత్తం తొలగించారు.
దాత ముందుకు..: బెంగళూరుకు చెందిన ఉన్నికృష్ణన్ పొట్టి అనే వ్యాపారవేత్త, వాటిని తన సొంత ఖర్చుతో బాగు చేయించి, కొత్త బంగారు పూతతో అందిస్తానని ముందుకు వచ్చారు.
బరువులో తేడా: తాపడాలను తొలగించినప్పుడు వాటి బరువు 42.8 కిలోలుగా రికార్డుల్లో నమోదు చేశారు. కానీ, చెన్నైలోని స్మార్ట్ క్రియేషన్స్ అనే సంస్థకు వాటిని అందించినప్పుడు, బరువు కేవలం 38.28 కిలోలు మాత్రమే ఉంది.

4.5 కిలోల బంగారం మాయం: మధ్యలో దాదాపు 4.524 కిలోల బంగారం మాయమైనట్లు తేలింది.

హైకోర్టు ఆగ్రహం.. సిట్ దర్యాప్తు : ఈ వ్యవహారంపై దాఖలైన పిటిషన్‌ను విచారించిన కేరళ హైకోర్టు, ట్రావెన్‌కోర్ దేవస్వమ్ బోర్డు (TDB) అధికారుల తీరుపై తీవ్ర ఆగ్రహం వ్యక్తం చేసింది.
“అనుమతి లేకుండా తాపడాలను ఎలా తొలగిస్తారు? తిరిగి అమర్చేటప్పుడు బరువు ఎందుకు సరిచూడలేదు?” అని కోర్టు ప్రశ్నించింది. ఈ బంగారం మాయంపై దర్యాప్తు చేసేందుకు ప్రత్యేక దర్యాప్తు బృందాన్ని (SIT) ఏర్పాటు చేసింది.

ప్రధాన నిందితుడి అరెస్ట్.. తాపడాల పునఃప్రతిష్ఠ : సిట్ దర్యాప్తులో భాగంగా, ప్రధాన నిందితుడైన దాత ఉన్నికృష్ణన్ పొట్టిని గురువారం అరెస్ట్ చేశారు. ఈ నేపథ్యంలోనే, హైకోర్టు ఆదేశాల మేరకు, పునరుద్ధరించిన 14 బంగారు-రాగి తాపడాలను ఆలయ పూజారులు, అధికారుల సమక్షంలో ద్వారపాలక విగ్రహాలకు తిరిగి బిగించారు.

తుల మాస పూజలకు ఆలయం ఓపెన్ : ఇదిలా ఉండగా, తుల మాస పూజల కోసం శబరిమల అయ్యప్ప ఆలయాన్ని శుక్రవారం సాయంత్రం తెరిచారు. అక్టోబర్ 22 వరకు ఆలయం తెరిచి ఉంటుందని, ఇప్పటికే 30,000 మంది భక్తులు దర్శనం కోసం ఆన్‌లైన్‌లో రిజిస్ట్రేషన్ చేసుకున్నారని TDB అధికారులు తెలిపారు. ఈ నెల 22న రాష్ట్రపతి ద్రౌపది ముర్ము కూడా ఆలయాన్ని సందర్శించనున్నారు.

బంగారం మాయం కేసులో TDB సభ్యులు, ఇతర అధికారుల పాత్రపై కూడా సిట్ దర్యాప్తు చేస్తోంది. ఆరు వారాల్లోగా పూర్తి నివేదిక సమర్పించాలని హైకోర్టు ఆదేశించడంతో, ఈ కేసులో మరిన్ని సంచలన విషయాలు వెలుగులోకి వచ్చే అవకాశం ఉంది.