ESI cashless healthcare scheme : ఉద్యోగం విరమణ పొందాక ఆరోగ్య ఖర్చులు ఎలా అనే చింత వేధిస్తోందా? వయసు పైబడ్డాక ఆసుపత్రుల చుట్టూ తిరగాలంటే ఆర్థిక భారం కుంగదీస్తుందా? ఇక ఆ దిగులు అక్కర్లేదు! వేతన జీవులకు కార్మికరాజ్య బీమా సంస్థ (ఈఎస్‌ఐసీ) ఓ అద్భుతమైన తీపి కబురు మోసుకొచ్చింది. నెలకు కేవలం పది రూపాయల నామమాత్రపు రుసుముతో, జీవితాంతం మీకూ, మీ జీవిత భాగస్వామికీ నగదు రహిత (క్యాష్‌లెస్) వైద్య సేవలు అందించేందుకు మార్గం సుగమం చేసింది. 

అర్హులు ఎవరు? : ఈఎస్‌ఐ చట్టంలోని 56వ సెక్షన్ ప్రకారం, పదవీ విరమణ చేసిన ఉద్యోగులకు ఈ వైద్య సేవలు పొందేందుకు అవకాశం కల్పించారు.

ప్రధాన అర్హత: ఈఎస్‌ఐసీ వేతన పరిమితి (సీలింగ్) పరిధిలో ఉంటూ పదవీ విరమణ చేసిన, వీఆర్‌ఎస్ తీసుకున్న, లేదా ఉద్యోగం ముందుగా మానేసిన వారు అర్హులు.

కీలక నిబంధన: ఉద్యోగ విరమణ లేదా వీఆర్‌ఎస్ తీసుకునే నాటికి, అంతకు ముందు వరుసగా ఐదేళ్ల పాటు మీ యాజమాన్యం మీ తరఫున ఈఎస్‌ఐ చందా కచ్చితంగా చెల్లించి ఉండాలి.

ప్రత్యేక వర్గం: ఉద్యోగంలో ఉండగా శాశ్వత వైకల్యం పొందిన వారికి కూడా ఈ పథకం వర్తిస్తుంది.

లభించే ప్రయోజనాలు.. చెల్లించాల్సింది నామమాత్రమే : ఈ పథకం కింద చేరిన విశ్రాంత ఉద్యోగులు, వారి జీవిత భాగస్వాములు.. ప్రస్తుతం ఉద్యోగంలో ఉన్న ఈఎస్‌ఐ లబ్ధిదారులతో సమానంగా వైద్య సేవలు పొందుతారు.

నగదు రహిత సేవలు: ఈఎస్‌ఐ డిస్పెన్సరీలు, ఆసుపత్రుల్లో ప్రాథమిక, ద్వితీయ శ్రేణి వైద్య సేవలను ఒక్క రూపాయి కూడా చెల్లించకుండా పొందవచ్చు. అవుట్ పేషెంట్ చికిత్స, సాధారణ వైద్య సేవలతో పాటు మందులను కూడా ఉచితంగా అందిస్తారు.

రుసుము: ఈ ప్రయోజనాలన్నింటికీ నెలకు రూ.10 చొప్పున, ఏడాదికి అయ్యే రూ.120 మొత్తాన్ని ఒకేసారి ముందస్తుగా చెల్లించాల్సి ఉంటుంది.
జీవితకాల భద్రత: ఈ పథకంలో నమోదైన ఉద్యోగి మరణించినప్పటికీ, వారి జీవిత భాగస్వామికి జీవితాంతం ఈ వైద్య సేవలు కొనసాగుతాయి.

రిజిస్ట్రేషన్ ప్రక్రియ ఇలా : ఈ పథకంలో చేరాలనుకునే వారు ఈ కింది పద్ధతిని అనుసరించాలి. పదవీ విరమణ తర్వాత, మీరు ఉద్యోగం ఎందుకు మానేశారో (పదవీ విరమణ/వీఆర్‌ఎస్) స్పష్టమైన కారణాలను పేర్కొంటూ మీ యాజమాన్యం నుంచి ధ్రువీకరణ పత్రం తీసుకోవాలి. ఈ ధ్రువీకరణ పత్రంతో పాటు, అవసరమైన దరఖాస్తు ఫారాలను పూర్తి చేసి, మీ సమీపంలోని ఈఎస్‌ఐసీ బ్రాంచ్ కార్యాలయంలో సమర్పించాలి.  క్షేత్రస్థాయి అధికారులు మీ పత్రాలను పరిశీలించి, మీ అర్హతను నిర్ధారిస్తారు.

రుసుము చెల్లింపు: అర్హులుగా తేలిన తర్వాత, ఏడాదికి రూ.120 చొప్పున రుసుమును ముందస్తుగా చెల్లించాలి. ఈ నగదు చెల్లించిన వారికి మాత్రమే ఉచిత వైద్య సేవలు అందుబాటులోకి వస్తాయి.

ముఖ్య గమనిక: దరఖాస్తు సమయంలో మీ జీవిత భాగస్వామి (భార్య/భర్త) వివరాలను నమోదు చేయడం తప్పనిసరి. అప్పుడే ఇద్దరూ వృద్ధాప్యంలో ఈ వైద్య సేవలు పొందేందుకు వీలుంటుంది. మీ ఈఎస్‌ఐ ‘పెహచాన్’ కార్డు ద్వారా కూడా ఈ ప్రక్రియను పూర్తి చేయవచ్చు.

తెలంగాణలో అందుబాటులో ఉన్న కేంద్రాలు: తెలంగాణ రీజియన్ పరిధిలో 56 ఈఎస్‌ఐ డిస్పెన్సరీలు ఉన్నాయి. వీటితో పాటు నిజామాబాద్, నాచారం, ఆర్‌సీపురం, సిర్పూర్ కాగజ్‌నగర్, వరంగల్‌లలో రాష్ట్ర ప్రభుత్వ ఆధ్వర్యంలోని ఈఎస్‌ఐ ఆసుపత్రులు, సనత్‌నగర్‌లోని కేంద్ర కార్మిక శాఖ ఆధీనంలో ఉన్న ఈఎస్‌ఐసీ ఆసుపత్రి, వైద్య కళాశాలలో ఈ సేవలను పొందవచ్చు.