దీపావళి సంబరాలను జడ్చర్ల మున్సిపాలిటీ ప్రజలు గురువారం, శుక్రవారం ఘనంగా జరుపుకున్నారు. దీపావళి పండుగతో తమ ఇళ్లల్లో కొత్త వెలుగులు నింపాలని కోరుతూ ప్రజలు పలు ఆలయాలకు వెళ్లి పూజలు నిర్వహించారు.

దీపావళి సందర్భంగా మున్సిపాలిటీ ప్రజలు గౌరీ నోములు, లక్ష్మీ వ్రతాలు ఘనంగా నిర్వహించి తమ మొక్కులను తీర్చుకున్నారు. పండుగ సందర్భంగా ప్రజలు ఇంటింటా తమ వాకిట్లో దీపాలు వెలిగించారు.

అనంతరం టపాసులు పేల్చి ఆనందోత్సవాలతో పండుగ వేడుకలను ఘనంగా జరుపుకున్నారు. ఆకాశమంత రాకెట్లు చిమ్మిన విధంగా పూల వెలుగులతో పట్టణంలో నూతన శోభ సంతరించుకుంది. చిన్నారులు, పెద్దలు బాణాసంచా కాలుస్తూ ఆనందంగా గడిపారు.