Tampering with vehicle number plates to avoid fines : హెల్మెట్ లేదా? ఫైన్! స్పీడ్ వెళ్తున్నారా? ఫైన్! సిగ్నల్ జంప్ చేశారా? ఫైన్! నగరంలో పోలీసుల నిఘా పెరిగేకొద్దీ, చలాన్ల మోత మోగిపోతోంది. ఈ జరిమానాల భారం నుంచి తప్పించుకోవడానికి కొందరు ప్రబుద్ధులు వేస్తున్న ఎత్తులు, వేషాలు చూస్తే పోలీసులే ముక్కున వేలేసుకోవాల్సి వస్తోంది. నంబర్ ప్లేట్లలో అంకెలు మాయం చేయడం దగ్గర్నుంచి, వాటిపై మట్టి పూయడం, కాగితాలు అంటించడం వరకు వీరి ‘నంబర్ ట్రిక్కులు’ అన్నీ ఇన్నీ కావు. అసలు ఈ కొత్త తరహా మోసాలు ఎలా జరుగుతున్నాయి? వీటి వల్ల కేవలం ప్రభుత్వ ఖజానాకే గండి పడుతోందా, లేక సమాజ భద్రతకే పెను ముప్పు పొంచి ఉందా..? ఈ గారడీకి పోలీసులు ఎలా అడ్డుకట్ట వేయబోతున్నారు..?

చలాన్ల నుంచి తప్పించుకునేందుకు నానా తంటాలు: ట్రాఫిక్ నిబంధనలను ఉల్లంఘించడం, ఆపై చలాన్ల నుంచి తప్పించుకోవడానికి వాహనదారులు రకరకాల అడ్డదారులు తొక్కుతున్నారు.

అంకెలు మాయం: నంబర్ ప్లేట్‌పై ఉన్న మొత్తం నంబర్‌లో ఏదో ఒక అంకెను చెరిపేయడం లేదా కనిపించకుండా చేయడం ఒక పద్ధతి. ఆ స్థానంలో రాజకీయ పార్టీల స్టిక్కర్లు, నాయకుల పేర్లు, నినాదాలు అతికించి తిరుగుతున్నారు.

మట్టి, కాగితాలతో మాయ: కొందరైతే, నంబర్ ప్లేట్‌పై ఉద్దేశపూర్వకంగా మట్టి పూయడం, బురద జల్లడం, లేదా సగం నంబర్ కనిపించేలా కాగితాలు అంటించడం వంటివి చేస్తున్నారు. దీనివల్ల నిఘా కెమెరాలకు నంబర్ సరిగా చిక్కదు.

శారీరక విన్యాసాలు: మరికొందరు అత్యుత్సాహంతో, కెమెరాలు కనిపించగానే నంబర్ ప్లేట్‌కు కాలు అడ్డుపెట్టడం, చేత్తో మూసేయడం వంటి విన్యాసాలకు పాల్పడుతున్నారు. ఇది బ్యాలెన్స్ తప్పి ప్రాణాల మీదికి తెచ్చుకోవడమేనని పోలీసులు హెచ్చరిస్తున్నారు.

తాత్కాలిక నంబర్‌తో ఏళ్ల తరబడి : కొత్త వాహనం కొన్నప్పుడు ఇచ్చే తాత్కాలిక రిజిస్ట్రేషన్ (TR) నంబర్‌తోనే కొందరు ఏళ్ల తరబడి బండి నడిపేస్తున్నారు. నెల రోజుల్లో శాశ్వత నంబర్ తీసుకోవాలన్న నిబంధనను గాలికి వదిలేస్తున్నారు. దీనివల్ల అతివేగంగా వెళ్లినా, నిబంధనలు ఉల్లంఘించినా స్పీడ్ గన్‌లకు, నిఘా కెమెరాలకు చిక్కకుండా తప్పించుకుంటున్నారు.

నేరస్తులకు అడ్డా: ఈ ‘నంబర్ ట్రిక్కులు’ కేవలం చలాన్ల ఎగవేతకే పరిమితం కావడం లేదు. ఇది అసాంఘిక శక్తులకు, నేరస్తులకు వరంగా మారింది. ఇటీవల హైదరాబాద్‌లో వాహనాలను దొంగిలించిన ఓ ముఠా, వాటిని నిజామాబాద్ జిల్లా బాన్సువాడలో తక్కువ ధరకు అమ్మింది. సరైన పత్రాలు, నంబర్ ప్లేట్లు లేని ఈ వాహనాలను పోలీసులు తనిఖీల్లో పట్టుకున్నప్పుడు అసలు విషయం బయటపడింది. ఆన్‌లైన్‌లో తనిఖీ చేయగా, అవన్నీ హైదరాబాద్‌లో చోరీకి గురైన వాహనాలుగా తేలడంతో అధికారులే అవాక్కయ్యారు.

పోలీసుల హెచ్చరిక: “వాహనాల తనిఖీలను ముమ్మరం చేశాం. నిబంధనలు పాటించని వారికి కఠినంగా జరిమానాలు విధిస్తున్నాం. నంబర్ ప్లేట్ సరిగా లేని, పత్రాలు చూపించని వాహనాలను జప్తు చేస్తున్నాం,” అని బాన్సువాడ సీఐ అశోక్ స్పష్టం చేశారు. సరైన పత్రాలు లేని వాహనాలను తక్కువ ధరకు వస్తున్నాయని ఆశపడి కొంటే, భవిష్యత్తులో తీవ్ర ఇబ్బందులు తప్పవని ఆయన ప్రజలను హెచ్చరించారు.