Physical education teacher Free Training : పొద్దుపొడవక ముందే ఆ ఊరి మైదానం యువతతో సందడిగా మారుతుంది. వారిలో ఉత్సాహం నింపుతూ, వారి అడుగులకు పదును పెడుతూ ఓ వ్యక్తి నిరంతరం శ్రమిస్తుంటారు. ఆయనే గంగాసాగర్, వృత్తిరీత్యా ఓ ప్రభుత్వ వ్యాయామ ఉపాధ్యాయుడు. కానీ ప్రవృత్తిరీత్యా, ఆ ప్రాంత యువతకు ఆశాకిరణం. ఎలాంటి స్వార్థం లేకుండా, ఒక్క రూపాయి ఆశించకుండా తన స్వేదాన్ని చిందించి, వందలాది మంది యువకులను దేశ సేవ వైపు, పోలీసు ఉద్యోగాల వైపు నడిపిస్తున్నారు. ఒకరు కాదు, ఇద్దరు కాదు… ఇప్పటివరకు 53 మంది జీవితాల్లో ఆయన కొలువుల వెలుగులు నింపారు. 

సేవకు పునాది.. ఉద్యోగానికి ముందే : జగిత్యాల జిల్లా మల్యాల మండలం తక్కళ్లపల్లి గ్రామానికి చెందిన గంగాసాగర్, ప్రస్తుతం సమీపంలోని తాటిపల్లి పాఠశాలలో వ్యాయామ ఉపాధ్యాయుడిగా పనిచేస్తున్నారు. అయితే, ఆయన సేవా ప్రస్థానం ప్రభుత్వ ఉద్యోగం రాకముందే, 2016లోనే మొదలైంది. ‘స్వాధ్యాయ పరివార్’ స్ఫూర్తితో, తోటివారికి సాయం చేయాలనే తపనతో తన గ్రామంలోని యువతకు ఉచితంగా శిక్షణ ఇవ్వడం ప్రారంభించారు. అది నేటికీ నిరంతరాయంగా కొనసాగుతోంది. తన అధికారిక విధులకు వెళ్లకముందే, ప్రతిరోజూ వేకువజామునే లేచి తన సొంత గ్రామ మైదానంలో యువత కోసం రెండు గంటలు కేటాయిస్తారు.

శిక్షణ క్షేత్రం.. రాటుదేలుతున్న యువత : గంగాసాగర్ శిక్షణ కేవలం మొక్కుబడిగా ఉండదు. ఆర్మీ, పోలీసు ఉద్యోగాలకు అవసరమైన ప్రతి అంశంలోనూ మెలకువలు నేర్పిస్తారు.
ఆర్మీ అభ్యర్థులకు: అత్యంత కఠినమైన 1600 మీటర్ల పరుగును కేవలం 5.30 నిమిషాల్లో ఎలా పూర్తి చేయాలో ప్రత్యేక వ్యూహాలతో శిక్షణ ఇస్తారు. ‘పుల్ అప్స్’ వంటి వాటిలోనూ తర్ఫీదునిస్తారు.

కానిస్టేబుల్ అభ్యర్థులకు: 1600 మీటర్ల పరుగుతో పాటు, లాంగ్ జంప్, షాట్‌పుట్‌లో ప్రత్యేక శిక్షణ ఉంటుంది. శిక్షణకు అవసరమైన హర్డిల్స్, డంబెల్స్ వంటి పరికరాలను కూడా గంగాసాగర్ తన సొంత డబ్బుతోనే సమకూరుస్తుండటం విశేషం. ఆయన కీర్తి చుట్టుపక్కల మండలాలైన పెగడపల్లి, గొల్లపల్లి వరకు వ్యాపించడంతో, అక్కడి యువత సైతం తక్కళ్లపల్లికి వచ్చి ఆయన వద్ద శిక్షణ పొందుతున్నారు.

అద్భుత ఫలితాలు.. కొలువుల పంట : గంగాసాగర్ నిస్వార్థ సేవ అద్భుతమైన ఫలితాలనిస్తోంది. ఇప్పటివరకు ఆయన వద్ద దాదాపు 300 మందికి పైగా యువతీ యువకులు శిక్షణ పొందారు. వారిలో ఏకంగా 53 మంది ప్రభుత్వ కొలువులను సాధించి తమ జీవితాలను స్థిరపరుచుకున్నారు.

పోలీస్ కానిస్టేబుళ్లు: 30 మంది
ఆర్మీ జవాన్లు: 22 మంది
నేవీ: 1 వ్యక్తి.. ఈ గణాంకాలే ఆయన కృషికి, చిత్తశుద్ధికి నిలువుటద్దం.

ఆదర్శ ఉపాధ్యాయుడి ఆశయం : “యువత చెడు మార్గాల వైపు, దురలవాట్ల బారిన పడకుండా ఉండాలి. ప్రభుత్వ ఉద్యోగాలు సాధించి, వారి జీవితాలు స్థిరపడితేనే సమాజం కూడా ప్రశాంతంగా ఉంటుంది. ఈ ఆలోచనతోనే నేను ఆర్మీ, పోలీసు నియామకాల సమయంలో ఉచితంగా శిక్షణ ఇస్తున్నాను. నా వృత్తితో పాటు ఈ ప్రవృత్తి నాకు ఎంతో సంతృప్తినిస్తుంది.”
– గంగాసాగర్, వ్యాయామ ఉపాధ్యాయుడు