Asaduddin Owaisi on Marwari Go Back campaign: తెలంగాణలో గత కొంతకాలంగా సామాజిక మాధ్యమాల్లో, వ్యాపార వర్గాల్లో ప్రకంపనలు సృష్టిస్తున్న ‘మార్వాడీ గో బ్యాక్’ నినాదంపై ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ ఎట్టకేలకు స్పందించారు. ఒక చిన్న వివాదంతో మొదలైన ఈ ఉద్యమం, రాష్ట్రవ్యాప్తంగా బంద్‌కు దారితీసే స్థాయికి చేరడంతో, ఈ వివాదంపై ఒవైసీ ఏమని స్పందిస్తారు, ఎవరి పక్షాన నిలుస్తారన్న ఉత్కంఠ సర్వత్రా నెలకొంది.
చిన్న వివాదంతో మొదలైన చిచ్చు:
ఈ ‘గో బ్యాక్’ ఉద్యమానికి సికింద్రాబాద్‌లోని మోండా మార్కెట్‌లో జరిగిన ఓ చిన్న ఘటనే బీజం వేసింది. ఓ ఆభరణాల దుకాణం వద్ద కారు పార్కింగ్ విషయంలో తలెత్తిన వివాదంలో, దుకాణ యజమాని (మార్వాడీ వర్గానికి చెందిన వ్యక్తి) అణగారిన వర్గానికి చెందిన వ్యక్తిపై దాడి చేశారన్న ఆరోపణలు వెల్లువెత్తాయి. ఈ ఒక్క సంఘటనే అప్పటికే స్థానిక వ్యాపారుల్లో ఉన్న అసంతృప్తికి ఆజ్యం పోసింది.
ఉద్యమంగా మారిన ఆగ్రహం:
ఆ ఒక్క ఘటనతో, పలు వాణిజ్య సంఘాలు, దళిత సంస్థలు ఒక్కతాటిపైకి వచ్చాయి. మార్వాడీ వ్యాపారులు తెలంగాణలో ఆర్థిక దోపిడీకి పాల్పడుతున్నారని, అనైతిక వ్యాపార పద్ధతులను అవలంబిస్తున్నారని వారు ఆరోపించారు.
ఆరోపణలు:
కల్తీ, నకిలీ ఉత్పత్తులను అమ్ముతూ స్థానిక వ్యాపారాలను దెబ్బతీస్తున్నారని, వ్యాపార రంగంలో గుత్తాధిపత్యం చెలాయిస్తున్నారని తీవ్ర విమర్శలు చేశారు.
ఆగస్టు 22న బంద్:
ఈ ఆరోపణలకు బలం చేకూరుస్తూ, ‘మార్వాడీ గో బ్యాక్’ ప్రచారానికి మద్దతుగా ఆగస్టు 22న తెలంగాణలోని పలు జిల్లాల్లో వ్యాపారులు బంద్ పాటించారు. దీంతో ఈ వివాదం రాష్ట్రవ్యాప్తంగా తీవ్ర చర్చనీయాంశంగా మారింది.
ఒవైసీ హితవు – వివాదాన్ని పెద్దది చేయొద్దు:
ఈ సున్నితమైన అంశంపై ఎట్టకేలకు మౌనం వీడిన హైదరాబాద్ ఎంపీ అసదుద్దీన్ ఒవైసీ, సంయమనం పాటించాలని పిలుపునిచ్చారు. మీడియా ప్రతినిధులు ఈ ప్రచారంపై ప్రశ్నించగా, “కొన్ని సోషల్ మీడియా ప్రచారాలు జరుగుతున్నాయని నా దృష్టికి వచ్చింది. దానికి అంత ప్రాముఖ్యత ఇవ్వాలని నేను అనుకోవడం లేదు,” అని వ్యాఖ్యానించారు. “కొన్ని సమస్యలు అక్కడక్కడా తలెత్తుతూనే ఉంటాయి. కానీ, దానిని ఆ స్థాయికి విస్తరించాలనుకోవడం మంచిది కాదు,” అంటూ వివాదాన్ని మరింత పెద్దది చేయవద్దని ఆయన హితవు పలికారు. ఈ వ్యాఖ్యల ద్వారా, నగరంలోని శాంతి, సామరస్య వాతావరణానికి భంగం కలగకూడదనే ఉద్దేశాన్ని ఆయన పరోక్షంగా వెల్లడించారు.
