Millet tiffins for Hyderabad People: హైదరాబాద్ నగర ప్రజలకు ఒక శుభవార్త! గ్రేటర్ హైదరాబాద్ మునిసిపల్ కార్పొరేషన్ (GHMC) తాజాగా ఆరోగ్యకరమైన మరియు అందుబాటు ధరలో టిఫిన్ అందించేందుకు ఇందిరమ్మ క్యాంటీన్లు అనే కొత్త ప్రాజెక్ట్‌ను ప్రారంభించబోతోంది. ఈ పథకం ద్వారా నగరంలోని పేద ప్రజలు, కూలీలు, చిన్న ఉద్యోగులు ప్రతిరోజూ కేవలం రూ.5కే రుచికరమైన, పోషక విలువలతో కూడిన ఆహారాన్ని పొందగలుగుతారు.

మిల్లెట్ టిఫిన్ ప్రత్యేకత

ఈ స్కీమ్‌ యొక్క ప్రధాన ఆకర్షణగా మిల్లెట్లతో (సిరిధాన్యాలు) తయారు చేసిన టిఫిన్లు అని చెప్పుకోవచ్చు. సాంప్రదాయ ధాన్యాలపై ఆధారపడిన ఆహారం శరీరానికి తక్కువ గ్లైసెమిక్ ఇన్‌డెక్స్ కలిగి ఉండి, రక్తంలో చక్కెర స్థాయిని నియంత్రించడంలో సహాయపడుతుంది. ఇది ముఖ్యంగా డయాబెటిక్ మరియు ఆరోగ్యంపై శ్రద్ధ ఉన్నవారికి ఎంతో ఉపయోగకరం.

ప్రతి రోజు ప్రత్యేకమైన మెనూ: సోమవారం నుంచి శనివారం వరకూ

GHMC తయారుచేసిన మెను ప్రకారం, వారం పొడవునా రకరకాల ఆరోగ్యకరమైన టిఫిన్లు అందించనున్నారు:

వారంలో రోజు టిఫిన్ ఐటమ్ సైడ్ డిష్‌లు
సోమవారం మిల్లెట్ ఇడ్లీ (3) సాంబార్, చట్నీ లేదా పొడి
మంగళవారం మిల్లెట్ ఉప్మా సాంబార్, మిక్స్‌డ్ చట్నీ
బుధవారం పొంగల్ సాంబార్, చట్నీ
గురువారం ఇడ్లీ (3) సాంబార్, చట్నీ
శుక్రవారం పొంగల్ సాంబార్, చట్నీ
శనివారం పూరీ (3) ఆలూ కుర్మా

ఆదివారం సెలవు

ధరలు..

ఈ పథకం ప్రకారం ప్రతి టిఫిన్‌కు అసలు వ్యయం సుమారు రూ.19 ఉంటుంది. ఇందులో ప్రజలు కేవలం రూ.5 మాత్రమే చెల్లించాలి. మిగిలిన రూ.14 GHMC తరపున భరిస్తుంది. ఇది ప్రభుత్వ-ప్రైవేట్ భాగస్వామ్యం ద్వారా అమలు చేయబోతున్నారు. ఈ టిఫిన్ కేంద్రాలను 139 ప్రదేశాల్లో ఏర్పాటు చేయడానికి GHMC ఇప్పటికే ఏర్పాట్లు ప్రారంభించింది. మొదటి దశలోనే రూ.11.43 కోట్ల నిధులు ఖర్చు చేయనుంది. త్వరలోనే ముఖ్యమంత్రి రేవంత్ రెడ్డి చేతుల మీదుగా ఈ క్యాంటీన్ల ప్రారంభోత్సవం జరగనుంది. అంతేగాక, ఈ పథకాన్ని విజయవంతంగా అమలు చేయేందుకు హరే రామ హరే కృష్ణ మూవ్‌మెంట్ వంటి సేవా సంస్థలతో GHMC ఒప్పందం కుదుర్చుకున్నట్లు సమాచారం.

ఈ స్కీం ద్వారా లబ్ధిపొందే వారు ఎవరు?

రోజువారీ కూలీలు
అటు బస్తీల్లో నివసించే కుటుంబాలు
చిన్న ఉద్యోగులు, చిన్న వ్యాపారులు
వృద్ధులు, పని కోసం బయటికెళ్లే యువత

ఈ పథకం విజయవంతమైతే, GHMC దానిని ఇతర ప్రాంతాలకు కూడా విస్తరించే అవకాశం ఉంది. మిల్లెట్ ఆధారిత ఆహార పద్ధతులు ప్రపంచవ్యాప్తంగా గుర్తింపు పొందుతున్న నేపథ్యంలో, ఈ టిఫిన్ స్కీమ్ అనేది ఆరోగ్యానికి తోడ్పడటమే కాకుండా, స్థానికంగా మిల్లెట్ పండించే రైతులకు మార్కెట్ అవకాశాలను కల్పించవచ్చు. మీ ప్రాంతంలో ఇలాంటి టిఫిన్ సెంటర్ ఉన్నదా? లేదంటే మీ వాడకు అవసరమా? మీ అభిప్రాయాలను స్థానిక GHMC కార్యాలయానికి తెలియజేయండి.. ఎందుకంటే ప్రజల శ్రేయస్సే పాలకుల లక్ష్యం!