రైతుల పట్ల కాంగ్రెస్ ప్రభుత్వం అమానుషంగా ప్రవర్తిస్తుందని బీఆర్ఎస్ వర్కింగ్ ప్రెసిడెంట్ కేటీఆర్(KTR) తీవ్ర ఆగ్రహం వ్యక్తం చేశారు. సమైక్యరాష్ట్రంలో పీడించిన సంక్షోభం ఆనవాళ్లను..తెలంగాణ నేలపై మళ్లీ తెస్తామంటే రైతాంగం సహించదని హెచ్చరించారు. ఈమేరకు ఎక్స్ వేదికగా ట్వీట్ చేశారు
“నిన్న ఓ రైతు ఇంటి గేటు ఎత్తుకెళ్లారు. నేడు స్టార్టర్లు పీక్కెళ్లారు. ఇక రేపు పుస్తెలతాళ్లు లాక్కెళతారా? తెలంగాణ ఆడబిడ్డలారా…! ఈ తెలివితక్కువ కాంగ్రెస్ సర్కారుతో జెర పైలం. అప్పుల పాలైన అన్నదాతలపై ఇంత కక్షనా ? కష్టాల్లో ఉన్న కర్షకులపై కాంగ్రెస్ కు ఇంత కోపమా ? అని ప్రశ్నించారు. సాగు నీళ్లిచ్చే సోయి లేదు..పంటలు ఎండుతున్నా పట్టింపు లేదు.. కానీ..రైతులు అష్టకష్టాలు పడుతుంటే వేధింపులా ? బీఆర్ఎస్ ప్రభుత్వం రద్దుచేసిన నీటి తీరువాను.. ఐదేళ్ల తరువాత ఇప్పుడు వసూళ్లకు తెగబడతారా ? తెలంగాణ రైతులంటే అంత అలుసైపోయారా ? ఓట్లనాడు ప్రేమ ఒలకబోసి గద్దెనెక్కాక నరకం చూపిస్తారా ??
2 లక్షల రుణమాఫీ సక్కగ చేయని..సన్నాసులు ఇంత దారుణానికి ఒడిగడతారా ? రైతు భరోసాకు సవాలక్ష ఆంక్షలు పెట్టి..రైతన్నను సంక్షోభంలోకి నెట్టింది మీరు కాదా?? పెట్టుబడి సాయాన్ని ఎగ్గొట్టి..మళ్లీ అప్పులపాలయ్యేలా చేసిన పాపం మీది కాదా..? ఆత్మగౌరవంతో బతికే అన్నదాతలపై ఈ వరుస దాష్టీకాలేంటి ? మీరు చేసిన పాపాలకు బక్కచిక్కిన రైతులపై ఈ దుర్మార్గాలేంటి ? వ్యవసాయరంగంలో సంతోషం ఆనవాళ్లు చెరిపేసి.. సమైక్యరాష్ట్రంలో పీడించిన సంక్షోభం ఆనవాళ్లను..తెలంగాణ నేలపై మళ్లీ తెస్తామంటే రైతాంగం సహించదని..సంఘటితంగా పోరాడుతది..! సీఎంకు బుద్ధి చెబుతది” అని కేటీఆర్ హెచ్చరించారు.
