New Bar Policy in Andhra Pradesh: ఆంధ్రప్రదేశ్‌లో కొత్త బార్ పాలసీ నిన్నటి (సెప్టెంబర్ 1) నుంచి అమల్లోకి వచ్చింది. ఈ కొత్త పాలసీ ప్రకారం, రాష్ట్రంలోని బార్లన్నీ ఉదయం 10 గంటల నుంచి అర్ధరాత్రి 12 గంటల వరకు తెరిచి ఉంటాయి. గతంలో రాత్రి 11 గంటలకే మూతపడే బార్ల సమయాన్ని అదనంగా మరో గంటపాటు పొడిగించారు. ఈ కొత్త విధానం 2025 నుంచి 2028 వరకు మూడేళ్ల పాటు అమలులో ఉంటుంది.
కొత్త పాలసీలోని ముఖ్యాంశాలు
లాటరీ పద్ధతిలో లైసెన్సులు: ప్రభుత్వం పారదర్శకతకు ప్రాధాన్యత ఇస్తూ, ప్రజల నుంచి దరఖాస్తులు స్వీకరించిన తర్వాత లాటరీ పద్ధతిలో బార్ లైసెన్స్‌లను కేటాయిస్తుంది.
10% కల్లు గీత కార్మికులకు కేటాయింపు: సామాజిక సమానత్వం, సాధికారతను ప్రోత్సహించే లక్ష్యంతో మొత్తం బార్ లైసెన్స్‌లలో 10 శాతం కల్లు గీత కులాల వారికి కేటాయించారు. ఈ రిజర్వ్‌డ్ కేటగిరీ కింద లైసెన్స్ పొందే బార్లకు లైసెన్స్ ఫీజులో 50 శాతం రాయితీ కూడా ఉంటుంది.
కొత్త నిబంధనలు: దరఖాస్తుదారులు అప్లికేషన్ సమర్పించే సమయంలో రెస్టారెంట్ కలిగి ఉండాల్సిన అవసరం లేదు. కానీ, లైసెన్స్ మంజూరు అయిన తర్వాత 15 రోజుల్లోపు తప్పనిసరిగా రెస్టారెంట్ ఏర్పాటు చేయాలి.
కొత్త ప్రదేశాల్లో బార్ల ఏర్పాటు: కొత్త ఎక్సైజ్ పాలసీ ప్రకారం పట్టణ స్థానిక సంస్థలు, నోటిఫైడ్ పర్యాటక ప్రాంతాలలో బార్లను ఏర్పాటు చేసుకోవచ్చు. అయితే మతపరమైన పర్యాటక కేంద్రాలలో మాత్రం దీనికి అనుమతి లేదు.
భవిష్యత్ ప్రణాళికలు: భవిష్యత్ అవసరాల ఆధారంగా అర్బన్ డెవలప్‌మెంట్ అథారిటీలు, మెట్రోపాలిటన్ డెవలప్‌మెంట్ అథారిటీలు, పారిశ్రామిక కారిడార్లు మరియు సెజ్‌లలో బార్ లైసెన్స్‌ల విస్తరణకు ప్రభుత్వం నిబంధనలను రూపొందించింది.
ఈ నూతన పాలసీ రాష్ట్రంలోని బార్ పరిశ్రమలో గణనీయమైన మార్పులు తీసుకువస్తుందని అంచనా వేస్తున్నారు. ఈ చర్యతో రెవెన్యూతో పాటు పర్యాటకం కూడా మెరుగుపడుతుందని ప్రభుత్వం భావిస్తోంది.
