ఇటీవల తిరుపతిలో జరిగిన తొక్కిసలాట ఘటన(Tirupati Stampede incident)పై ఏపీ ప్రభుత్వం న్యాయ విచారణకు ఆదేశించింది. హైకోర్టు విశ్రాంత న్యాయమూర్తి జస్టిస్ సత్యనారాయణమూర్తి నేతృత్వంలో జ్యుడిషియల్ విచారణకు ఆదేశిస్తూ ఉత్తర్వులు జారీ చేసింది. ఈ ఘటనపై ఆరు నెలల్లో నివేదిక ఇవ్వాలని ఉత్తర్వుల్లో పేర్కొంది.

జనవరి 8న తిరుపతిలోని వైకుంఠ ద్వార దర్శన టోకెన్ల పంపిణీ కేంద్రాల వద్ద జరిగిన తొక్కిసలాటలో ఆరుగురు భక్తులు మృతి చెందిన సంగతి తెలిసిందే. ఈ ఘటనపై సీఎం చంద్రబాబు(CM Chandrababu), డిప్యూటీ సీఎం పవన్ కల్యాణ్(Pawan Kalyan) తీవ్ర ఆగ్రహం వ్యక్తం చేశారు. ఘటన జరిగిన తీరుపై ఆరా తీసి న్యాయ విచారణకు ఆదేశిస్తామని ప్రకటించారు. ఈమేరకు జ్యుడిషియల్ విచారణకు తాజాగా ఆదేశిస్తూ ప్రభుత్వం నిర్ణయం తీసుకుంది.