Guntur commercial property boom : చూడటానికి అదో మామూలు క్యాంటీన్. కానీ దాని అద్దె మాత్రం అసామాన్యం. నెలకు ఏకంగా ఐదున్నర లక్షల రూపాయలు! అసలు గుంటూరు కూరగాయల మార్కెట్‌లోని ఓ చిన్న దుకాణానికి ఇంత భారీ ధర పలకడం వెనుక ఉన్న మతలబు ఏమిటి..? వ్యాపారులు ఇంతలా పోటీ పడటానికి కారణమేంటి…? కేవలం రాజధాని ప్రభావమేనా, లేక మరేదైనా మాయ ఉందా..? ఈ వేలం పాట వెనుక ఉన్న ఆసక్తికరమైన లెక్కలు మీకోసం..!

ఒక్క వేలంతో.. పదింతల ఆదాయం : అమరావతి రాజధాని జిల్లాగా గుంటూరు రూపురేఖలు ఎలా మారుతున్నాయో చెప్పడానికి కొల్లి శారద హోల్‌సేల్ కూరగాయల మార్కెట్ షాపుల వేలమే నిలువుటద్దం. ఆర్టీసీ బస్టాండ్ ఎదురుగా ఉన్న ఈ మార్కెట్‌లోని 88 దుకాణాల ద్వారా గతంలో నగరపాలక సంస్థకు నెలకు కేవలం రూ.6.80 లక్షల ఆదాయం మాత్రమే వచ్చేది. లీజు గడువు ముగియడంతో తాజాగా నిర్వహించిన వేలంలో, కేవలం 81 దుకాణాలకే నెలకు ఏకంగా రూ.50 లక్షల ఆదాయం సమకూరనుంది. అంటే, ఆదాయం దాదాపు పది రెట్లు పెరిగింది. దీని ద్వారా కార్పొరేషన్‌కు ఏటా రూ.6 కోట్ల ఆదాయం రానుంది.

అసలు కథ.. 67వ నంబర్ దుకాణం : ఈ వేలంలో అందరి దృష్టినీ ఆకర్షించింది 67వ నంబర్ దుకాణం. కేవలం 336 చదరపు అడుగుల విస్తీర్ణం ఉన్న ఈ రెండంతస్తుల దుకాణాన్ని ఓ వ్యాపారి నెల అద్దె రూ.5.5 లక్షలకు పాడుకోవడం సంచలనం సృష్టించింది. మార్కెట్‌లోని ఇతర దుకాణాలు సగటున రూ.30 వేల నుంచి లక్ష లోపు పలకగా, ఈ ఒక్క దుకాణానికే ఇంత భారీ ధర రావడం అందరినీ ఆశ్చర్యపరిచింది.

అంత ధర ఎందుకంటే : ఈ దుకాణానికి ఇంతటి గిరాకీ ఉండటానికి ప్రధాన కారణం దాని వ్యాపార ప్రాముఖ్యం.

24 గంటల వ్యాపారం: ఇది హోల్‌సేల్ కూరగాయల మార్కెట్ కావడంతో, ఇక్కడ రాత్రి పగలు తేడా లేకుండా వ్యాపారం జరుగుతుంది. దీంతో ఈ దుకాణంలో నిర్వహించే క్యాంటీన్ 24 గంటలూ నడుస్తుంది.

వ్యూహాత్మక స్థానం: మార్కెట్‌కు ముఖద్వారంలో ఉండటం దీనికి మరో పెద్ద బలం. మార్కెట్‌కు వచ్చే ప్రతి ఒక్కరూ ఈ క్యాంటీన్‌ను దాటుకునే వెళ్లాలి. ఈ కారణాలతోనే వ్యాపారులు ఈ దుకాణాన్ని దక్కించుకోవడానికి నువ్వా నేనా అన్నట్లు పోటీ పడ్డారు.

రాజధాని ప్రభావమే : ఈ అద్దెల పెరుగుదల వెనుక అమరావతి రాజధాని ప్రభావం స్పష్టంగా కనిపిస్తోందని అధికారులు విశ్లేషిస్తున్నారు. రాజధాని జిల్లా కావడంతో గుంటూరులో వాణిజ్య కార్యకలాపాలు ఊపందుకున్నాయని, అందుకే వ్యాపారులు ఎంతటి అద్దె చెల్లించేందుకైనా వెనుకాడటం లేదని భావిస్తున్నారు. ఈ లీజు 25 ఏళ్ల పాటు ఉంటుందని, ప్రతి మూడేళ్లకు అద్దెలో 33 శాతం పెంపుదల ఉంటుందని కార్పొరేషన్ కమిషనర్ పులి శ్రీనివాస్ తెలిపారు.