Pavan Kalyan : ఆంధ్రప్రదేశ్ డిప్యూటీ సీఎం, జనసేన అధ్యక్షుడు పవన్ కల్యాణ్ 79వ స్వాతంత్ర దినోత్సవంలో కాకినాడలో జాతీయ జెండాను ఆవిష్కరించారు. ఈ సందర్భంగా ఆయన ఇచ్చిన ఉపన్యాసం ఉత్సాహాన్ని నింపింది. స్వాతంత్ర్యం కోసం త్యాగం చేసిన మహానుభావుల స్ఫూర్తిని స్మరించారు. “స్వాతంత్రం అనేది ఎందరో సమరయోధుల త్యాగఫలం. వారి ఆశయాలతోనే మా పాలన కొనసాగుతోంది,” అని అన్నారు.
పవన్ కల్యాణ్ ‘స్త్రీ శక్తి’ పథకాన్ని ప్రారంభించినట్లు ప్రకటించారు. ఈ పథకం ద్వారా రాష్ట్రవ్యాప్తంగా మహిళలు, ట్రాన్స్‌జెండర్‌లు ఆర్టీసీ బస్సుల్లో ఉచితంగా ప్రయాణించవచ్చు. ఈ హామీ ‘సూపర్ సిక్స్’లో భాగమని, మహిళల సాధికారతకు ప్రాధాన్యత ఇస్తున్నామని చెప్పారు. సుమారు 27 లక్షల మంది ఈ సౌకర్యం వినియోగించుకుంటారని అంచనా. రాష్ట్రంలో 74% బస్సులు ఈ పథకంలో భాగమవుతాయి.
గత వైకాపా పాలనను ‘చీకటి యుగం’గా విమర్శించారు. “2019-2024 మధ్య బ్రిటిష్ పాలనలా మారింది. గొంతెత్తిన వారిపై దాడులు జరిగేవి. కూటమి ప్రభుత్వం వచ్చాక ప్రజలు స్వేచ్ఛగా ఉన్నారు,” అని పేర్కొన్నారు. ప్రతిపక్షం ఓట్ల చోరీ ఆరోపణలపై సూచనగా, “గెలిచినప్పుడు ఒక న్యాయం, ఓడినప్పుడు మరో న్యాయమా?” అని ప్రశ్నించారు. రాష్ట్ర అభివృద్ధికి శాంతి, భద్రతలు కీలకమని, అవినీతిని సహించబోమని స్పష్టం చేశారు. ఈ వేడుకలో జనసేన, తెదేపా, భాజపా నేతలు, కార్యకర్తలు పెద్ద సంఖ్యలో పాల్గొన్నారు. పవన్ స్పీచ్ సోషల్ మీడియాలో వైరల్ అవుతోంది.
