High Paying Jobs in Software: సాఫ్ట్‌వేర్‌ పుణ్యమాని పట్టుమని పాతికేళ్లు నిండకముందే లక్షల్లో జీతాలు సంపాదిస్తున్నారు చాలామంది. అయితే, కొన్ని జాబ్స్‌కు విపరీతమైన డిమాండ్‌ ఉంటుంది. ఫ్రెషర్స్‌గా కెరీర్ ప్రారంభించాలనుకుంటున్న వారికి సాఫ్ట్‌వేర్‌ డెవలప్‌మెంట్ ఇంజినీర్‌, డేటా అనలిస్ట్, క్లౌడ్ ఆర్కిటెక్చర్ సపోర్ట్ / డెవాప్స్‌ ఇంజనీర్, ఇన్వెస్ట్‌మెంట్ బ్యాంకింగ్ విశ్లేషకుడు, డిజిటల్ మార్కెటింగ్ స్పెషలిస్ట్ విభాగాల్లో మంచి అవకాశాలు ఉన్నాయి. ఈ ఉద్యోగాల్లో చేరిన వారికి ప్రారంభ వేతనమే లక్షల్లో ఉంటుంది. మీరు కూడా ఫ్రెషర్‌గా ఉద్యోగం కోసం ప్రయత్నిస్తుంటే ఈ 5 ఉద్యోగాలపై ఓ లుక్కేయండి.

1. సాఫ్ట్‌వేర్‌ డెవలప్‌మెంట్‌ ఇంజినీర్‌

సాఫ్ట్ వేర్ డెవలప్మెంట్ ఇంజనీర్ ఎవర్ గ్రీన్ ఉద్యోగం అని చెప్పాలి. మీకు మంచి కోడింగ్ నైపుణ్యం ఉండి, ఈ ఉద్యోగంతో కెరీర్ ప్రారంభిస్తే మంచి భవిష్యత్ ఉంటుంది. ఈ ఉద్యోగంతో కెరీర్ ప్రారంభించిన వారికి ఏడాదికి రూ. 5 లక్షల నుండి రూ. 15 లక్షల వరకు జీతం ఉంటుంది. మంచి కోడింగ్ నైపుణ్యాలు కలిగిన ఐఐటీ/ఎన్‌ఐటీ/టాప్ కాలేజీల స్టూడెంట్స్‌కు రూ. 25 లక్షలకు పైగా ప్రారంభ జీతం లభించే అవకాశం ఉంది.
కావాల్సిన స్కిల్స్: జావా, పైథాన్, సీ++, డేటా స్ట్రక్చర్స్‌ తదితర ప్రోగామింగ్ లాంగ్వేజీలపై మంచి పట్టు ఉండాలి.

2. డేటా అనలిస్ట్ / జూనియర్ డేటా సైంటిస్ట్ (డేటా అనలిస్ట్‌ / జూటా డేటా సైంటిస్ట్‌)

వ్యాపార సమస్యలకు పరిష్కారాలను కనుగొనడంతో పాటు, భవిష్యత్తు ధోరణులను అంచనా వేయడానికి పెద్ద మొత్తంలో డేటాను విశ్లేషించడం ఈ ఉద్యోగంలో విధి. ఈ విభాగంలో ఎంపికైన వారికి ఏడాదికి రూ.4 లక్షల నుండి రూ.10 లక్షల వరకు వేతనం ఉంటుంది.
కావాల్సిన స్కిల్స్: పైథాన్‌ ప్రోగ్రామింగ్‌, ఎస్‌క్యూఎల్‌, డీబీఎంఎస్‌, కాగ్నోస్‌, డేటా మైనింగ్‌ తదితర టెక్నాలజీలపై పట్టు ఉండాలి.

3. క్లౌడ్ ఆర్కిటెక్చర్ సపోర్ట్ / డెవాప్స్‌ ఇంజనీర్ (క్లౌడ్‌ సపోర్ట్‌/ డెవాప్స్‌)

క్లౌడ్ కంప్యూటింగ్ ప్లాట్‌ఫామ్‌లలో (ఏడబ్ల్యూస్‌, అజూర్‌, జీసీపీ) అప్లికేషన్లు నిర్వహించాల్సి ఉంటుంది. ఈ విభాగంలో ఎంపికైన వారికి ఏడాదికి రూ.6 లక్షల నుండి రూ.12 లక్షల వరకు వేతనం ఉంటుంది.

కావాల్సిన స్కిల్స్: లైనెక్స్‌, నెట్‌వర్కింగ్, క్లౌడ్ ప్లాట్‌ఫామ్ సర్టిఫికేషన్‌ కోర్సులు చేసిన వారికి అవకాశం ఉంటుంది.

4. ఇన్వెస్ట్‌మెంట్ బ్యాంకింగ్ విశ్లేషకుడు / ఈక్విటీ పరిశోధన
స్టాక్ మార్కెట్ ధోరణులు, పెట్టుబడులు, లాభాలుపై లోతైన విశ్లేషణ చేసే సామర్థ్యం ఉండాలి. ఈ విభాగంలో ఎంపికైన వారికి ఏడాదికి రూ.8 లక్షల నుండి రూ.18 లక్షల వరకు వేతనం ఉంటుంది.
కావాల్సిన స్కిల్స్: అకౌంటింగ్ పరిజ్ఞానం, మైక్రోసాఫ్ట్‌ ఎక్సెల్‌ నైపుణ్యం, ఎక్కువ గంటలు పని చేయగల సామర్థ్యం ఉండాలి.

5. డిజిటల్ మార్కెటింగ్ స్పెషలిస్ట్

ఎస్‌ఈఓ, ఎస్‌ఈఎం, సోషల్ మీడియా మార్కెటింగ్, కంటెంట్ స్ట్రాటజీ ద్వారా ఆన్‌లైన్‌లో బ్రాండ్‌ను ప్రమోట్ చేయడంతో పాటు ఆదాయాన్ని పెంచడం ఈ ఉద్యోగంలో చేరిన వారు చేయాల్సి ఉంటుంది. ఈ ఉద్యోగంలో చేరితే సంవత్సరానికి రూ.3 లక్షల నుండి రూ.7 లక్షల వరకు వేతనం ఉంటుంది. బోనస్‌లు కూడా ఈ ఉద్యోగంలో ఎక్కువగా ఉంటాయి. గూగుల్‌ అనలిటిక్స్‌, ఎస్‌ఈఓ టూల్స్, కంటెంట్ డెవలప్‌మెంట్‌, మంచి కమ్యూనికేషన్ స్కిల్స్ ఉండాలి.