JNVST Class 6 Admission Last Date : గ్రామీణ ప్రాంతాల్లోని ప్రతిభావంతులైన విద్యార్థులకు నాణ్యమైన విద్యను అందించాలనే ఆశయంతో నడుస్తున్న జవహర్ నవోదయ విద్యాలయాల్లో (JNV) తమ పిల్లలను చదివించాలని కలలు కంటున్న తల్లిదండ్రులకు, విద్యార్థులకు ఇది ఒక తీపి కబురు. 2026-27 విద్యా సంవత్సరానికి గాను ఆరో తరగతిలో ప్రవేశాల కోసం దరఖాస్తు గడువును నవోదయ విద్యాలయ సమితి (NVS) మరోసారి పొడిగించింది. అసలు ఈ గడువు పెంపు వెనుక ఉన్న కారణాలేంటి..? దరఖాస్తు ప్రక్రియ ఎలా ఉంటుంది..? ప్రవేశ పరీక్ష విధానంలో ఏమైనా మార్పులున్నాయా..? 

జవహర్‌ నవోదయ విద్యాలయాల్లో (JNV) 2026-27 విద్యా సంవత్సరానికి ఆరో తరగతిలో ప్రవేశాలకు దరఖాస్తుల స్వీకరణ గడువును అధికారులు మరోమారు పొడిగించారు. విద్యార్థులు మరియు తల్లిదండ్రుల అభ్యర్థన మేరకు, గతంలో ప్రకటించిన గడువును సవరిస్తూ, ఆన్‌లైన్‌లో దరఖాస్తు చేసుకోవడానికి ఆగస్టు 27, 2025 వరకు అవకాశం కల్పించారు. తొలుత జులై 29గా ఉన్న గడువును, ఆ తర్వాత ఆగస్టు 13కు, ఇప్పుడు తాజాగా ఆగస్టు 27 వరకు పొడిగించడం ఇది రెండోసారి. ఈ నిర్ణయం, ఇంకా దరఖాస్తు చేసుకోని వేలాది మంది విద్యార్థులకు ఒక సువర్ణావకాశం అని చెప్పవచ్చు.

పరీక్షా తేదీలు: దేశవ్యాప్తంగా ఉన్న 654 జవహర్ నవోదయ విద్యాలయాల్లో సీట్ల భర్తీకి రెండు దశల్లో ప్రవేశ పరీక్ష (JNVST 2026) నిర్వహించబడుతుంది.

మొదటి దశ: ఆంధ్రప్రదేశ్, తెలంగాణ సహా పలు రాష్ట్రాల్లో డిసెంబర్ 13, 2025 (శనివారం) నాడు పరీక్ష జరుగుతుంది.
రెండో దశ: జమ్మూ కశ్మీర్ వంటి పర్వత ప్రాంత రాష్ట్రాల్లో ఏప్రిల్ 11, 2026 నాడు పరీక్ష నిర్వహిస్తారు.

ప్రవేశ ప్రక్రియ – రిజర్వేషన్లు: ప్రవేశ పరీక్షలో సాధించిన మెరిట్ ఆధారంగా విద్యార్థులకు సీట్లు కేటాయిస్తారు. నవోదయ విద్యాలయాల్లో ఆరో తరగతి నుంచి ఇంటర్మీడియట్ వరకు సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) సిలబస్‌తో ఉచిత విద్య, వసతి, భోజన సౌకర్యాలు కల్పిస్తారు.

మొత్తం సీట్లలో 75% గ్రామీణ ప్రాంత విద్యార్థులకు కేటాయించబడతాయి. మిగిలిన 25% సీట్లు పట్టణ ప్రాంత విద్యార్థులకు కేటాయిస్తారు. మొత్తం సీట్లలో మూడో వంతు బాలికలకు రిజర్వ్ చేయబడ్డాయి. ఆంధ్రప్రదేశ్‌లో 15, తెలంగాణలో 9 నవోదయ విద్యాలయాలు ఉన్నాయి. ఒక్కో విద్యాలయంలో గరిష్టంగా 80 మంది విద్యార్థులకు ప్రవేశం కల్పిస్తారు.

పరీక్షా విధానం: ప్రవేశ పరీక్ష ఆబ్జెక్టివ్ విధానంలో ఉంటుంది. మొత్తం 100 మార్కులకు, 80 ప్రశ్నలు ఉంటాయి. పరీక్షా సమయం 2 గంటలు.  ఒక్కో ప్రశ్నకు 1.25 మార్కులు ఉంటాయి మరియు నెగెటివ్ మార్కింగ్ లేదు. పరీక్షను తెలుగు, హిందీ, ఇంగ్లీష్‌తో పాటు అన్ని ప్రాంతీయ భాషల్లోనూ రాసే వెసులుబాటు ఉంది.

దరఖాస్తు విధానం: అర్హులైన విద్యార్థులు అధికారిక వెబ్‌సైట్ http://navodaya.gov.ద్వారా ఆన్‌లైన్‌లో ఉచితంగా దరఖాస్తు చేసుకోవచ్చు. దరఖాస్తు ప్రక్రియ చాలా సులభతరం చేయబడింది మరియు ఎటువంటి రుసుము చెల్లించాల్సిన అవసరం లేదు.