Uttar Pradesh heavy rain : వరుణుడి ప్రతాపానికి ఉత్తర భారతం విలవిలలాడుతోంది. చురుగ్గా మారిన నైరుతి రుతుపవనాలు కురిపిస్తున్న కుండపోత వర్షాలకు పవిత్ర గంగా, యమునా నదులు మహోగ్ర రూపం దాల్చాయి. ప్రయాగ్రాజ్ నుండి వారణాసి వరకు అనేక నగరాలు మరియు గ్రామాలు జల దిగ్బంధంలో చిక్కుకున్నాయి. లక్షలాది మంది జనజీవనం అస్తవ్యస్తంగా మారింది.
కుండపోత వర్షాలతో జలవిలయం
నైరుతి రుతుపవనాల ప్రభావం ఉత్తరప్రదేశ్, ఉత్తరాఖండ్ రాష్ట్రాలపై తీవ్రంగా ఉంది. గత కొన్ని రోజులుగా ఎడతెరిపి లేకుండా కురుస్తున్న భారీ వర్షాలకు జనజీవనం స్తంభించిపోయింది. ముఖ్యంగా మీర్జాపూర్‌, కాన్పూర్‌, లఖ్‌నవూ, ప్రయాగ్రాజ్, వారణాసి వంటి ప్రధాన నగరాల్లో రహదారులు చెరువులను తలపిస్తున్నాయి. లోతట్టు ప్రాంతాలు పూర్తిగా నీట మునిగిపోయాయి. వాతావరణ శాఖ హెచ్చరికల నేపథ్యంలో, లఖ్‌నవూలో సోమవారం 1 నుండి 12వ తరగతి వరకు పాఠశాలలకు సెలవు ప్రకటించారు. కాన్పూర్‌లో రోడ్లపైకి భారీగా వరద నీరు చేరడంతో వాహనదారులు తీవ్ర ఇబ్బందులు ఎదుర్కొంటున్నారు.
ప్రమాద ఘంటికలు మోగిస్తున్న నదులు
పర్వత ప్రాంతాల్లో కురుస్తున్న వర్షాలకు తోడు, మైదాన ప్రాంతాల్లోని వర్షాలతో నదుల్లోకి భారీగా వరద నీరు వచ్చి చేరుతోంది. ఫలితంగా, ఉత్తరప్రదేశ్ జీవనాడులైన గంగ, యమున, సరయు నదులు ప్రమాద స్థాయిని మించి ప్రవహిస్తున్నాయి.
ప్రయాగ్‌రాజ్‌లో త్రివేణి సంగమం: ప్రయాగ్‌రాజ్‌లో గంగ, యమున నదులు ప్రమాదకర స్థాయిలో ప్రవహిస్తుండటంతో, లోతట్టు ప్రాంతాల ప్రజలు తీవ్ర భయాందోళనలకు గురవుతున్నారు. వారి ఇళ్లు నీట మునగడంతో, నిరాశ్రయులై సురక్షిత ప్రాంతాలకు తరలివెళుతున్నారు.
అయోధ్యలో సరయు ఉద్ధృతి: అయోధ్య జిల్లాలో సరయు నది వరద ఉద్ధృతికి జల్వాన్‌పుర వంటి ప్రాంతాల్లో ఇళ్లను నీరు చుట్టుముట్టింది. ప్రజలు నిత్యవసరాల కోసం నీటిలోనే ప్రయాణం చేయాల్సిన దయనీయ పరిస్థితి నెలకొంది.
జలమయమైన కాశీ క్షేత్రం
హిందువులకు అత్యంత పవిత్రమైన పుణ్యక్షేత్రం వారణాసిలో గంగమ్మ మహోగ్ర రూపాన్ని ప్రదర్శిస్తోంది. రోజురోజుకు పెరుగుతున్న నీటిమట్టం తీర ప్రాంతాల ప్రజలను కలవరానికి గురిచేస్తోంది. గత మూడు రోజులుగా, వారణాసిలోని లోతట్టు ప్రాంతాల్లోని ఇళ్లు నీటిలోనే నానుతున్నాయి. అస్సీ ఘాట్ నుండి మణికర్ణిక ఘాట్ వరకు, అన్ని ఘాట్లు పూర్తిగా నీట మునిగాయి. దీంతో, సాంప్రదాయ పూజలు, కర్మకాండలకు తీవ్ర అంతరాయం ఏర్పడింది. గంగా నదికి ఉపనది అయిన వరుణానది కూడా ఉప్పొంగడంతో, తీరంలోని నివాస ప్రాంతాల్లోకి వరద నీరు చేరింది.
ఉత్తరాఖండ్‌లోనూ అదే పరిస్థితి – ఆరెంజ్ అలర్ట్ జారీ
ఉత్తరప్రదేశ్‌తో పాటు, ఉత్తరాఖండ్‌లోనూ వర్షాలు బీభత్సం సృష్టిస్తున్నాయి. డెహ్రాడూన్‌లో రాత్రి నుంచి ఎడతెరిపి లేకుండా కురుస్తున్న వర్షాలకు రహదారులు జలమయమయ్యాయి. డెహ్రాడూన్‌ సమీపంలోని ప్రముఖ తపకేశ్వర్‌ మహాదేవ్ ఆలయం వద్ద తమ్సా నది ఉగ్రరూపంతో ప్రవహిస్తోంది. వాతావరణ శాఖ అంచనాల ప్రకారం, ఆగస్టు 6వ తేదీ వరకు ఉత్తరప్రదేశ్‌లోని అనేక చోట్ల భారీ నుంచి అతి భారీ వర్షాలు కురిసే అవకాశం ఉన్న నేపథ్యంలో… ఉత్తరాఖండ్‌లోని పలు జిల్లాలకు సోమవారం ఆరెంజ్ అలర్ట్ జారీ చేసినట్లు అధికారులు తెలిపారు.
