Fake death certificate for property : కాగితాలపై ఆమె చనిపోయి మూడు దశాబ్దాలు దాటింది. ప్రభుత్వ రికార్డుల ప్రకారం ఆమె ఈ లోకంలోనే లేదు. కానీ, ఉన్నట్టుండి ఓ వృద్ధురాలు ‘అయ్యా.. నేను బతికే ఉన్నాను, ఇదిగో నా గుర్తింపు కార్డులు’ అంటూ సాక్షాత్తూ జిల్లా కలెక్టర్ ముందు ప్రత్యక్షమైతే? ఆస్తి కోసం రక్త సంబంధాలనే మరిచిపోతున్న కలికాలంలో, అత్తను బతికుండగానే కాగితాలపై చంపేసిన ఓ కోడలి ఘరానా మోసం ఛత్తీస్‌గఢ్‌లో వెలుగుచూసింది. ఆస్తిని కాజేయడానికి కోడలు పన్నిన ఈ కుట్ర 32 ఏళ్ల తర్వాత ఎలా బయటపడింది? ఈ అన్యాయంపై ఆ వృద్ధురాలు చేస్తున్న న్యాయపోరాటం ఏంటి? ఆ వివరాల్లోకి వెళ్తే..

అత్త బతికుండగానే.. కోడలి నకిలీ నాటకం : ఛత్తీస్‌గఢ్‌లోని బేమ్‌తరా జిల్లా, మారో ప్రాంతానికి చెందిన శైల్ శర్మ అనే వృద్ధురాలు తాజాగా కలెక్టరేట్‌లో జరిగిన ‘జనదర్శన్’ కార్యక్రమానికి హాజరయ్యారు. తాను బతికే ఉన్నానంటూ తన ఆధార్ కార్డు, పాన్ కార్డు, బ్యాంకు పాస్‌బుక్‌లను అధికారులకు చూపించి కన్నీటిపర్యంతమయ్యారు. అసలు విషయమేమిటంటే, శైల్ శర్మ కోడలు ఆస్తి కోసం దారుణమైన కుట్రకు తెరలేపింది. తన అత్త శైల్ శర్మ చనిపోయిందని 1993లోనే, అంటే 32 ఏళ్ల క్రితమే, ఒక నకిలీ మరణ ధ్రువీకరణ పత్రాన్ని సృష్టించింది.

ఈ నకిలీ పత్రాన్ని అడ్డం పెట్టుకుని, తన మామ దేవనారాయణ్ శర్మ పేరిట మధ్యప్రదేశ్‌లోని సత్నాలో ఉన్న భూమికి వారసులు ఎవరూ లేరని అధికారులను నమ్మించింది. ఆ తర్వాత ఆ భూమిని అక్రమంగా తన కూతురి (శైల్ శర్మ మనవరాలు) పేరిట మార్పిడి చేయించింది. ఈ మోసం జరిగినప్పుడు ఛత్తీస్‌గఢ్ ఇంకా మధ్యప్రదేశ్‌లో భాగంగానే ఉంది. మారోలో జారీ చేసిన నకిలీ సర్టిఫికెట్‌ను సత్నాలో ఉపయోగించి ఈ భూదందాకు పాల్పడింది.

32 ఏళ్ల తర్వాత వెలుగులోకి : ఇన్నేళ్లుగా ఈ మోసం గురించి తెలియని బాధితురాలు శైల్ శర్మకు ఇటీవలే అసలు విషయం తెలిసి గుండెలు బాదుకున్నారు. “ఆ నకిలీ పత్రం జారీ చేసినప్పుడు నా వయసు 58 ఏళ్లు, అప్పుడు నా భర్త కూడా బతికే ఉన్నారు. అలాంటిది నేను చనిపోయానని ఎలా పత్రాలు సృష్టిస్తారు?” అని ఆమె ఆవేదన వ్యక్తం చేశారు. తనకు జరిగిన అన్యాయంపై న్యాయం కోసం ప్రభుత్వ కార్యాలయాల చుట్టూ చెప్పులరిగేలా తిరిగారు. చివరికి, కలెక్టర్‌ను కలిసి తన గోడు వెళ్లబోసుకున్నారు.

కలెక్టర్ ఆదేశాలు.. దర్యాప్తు ప్రారంభం : బతికున్న మనిషి స్వయంగా వచ్చి ఫిర్యాదు చేయడంతో జిల్లా కలెక్టర్ విస్తుపోయారు. ఆమె సమర్పించిన పత్రాలను పరిశీలించి, ఈ ఘరానా మోసంపై తక్షణమే విచారణ జరపాలని సంబంధిత అధికారులను ఆదేశించారు. కేవలం తన కోడలిపైనే కాకుండా, ఈ నకిలీ పత్రాల తయారీలో పాలుపంచుకున్న అధికారులపైనా కఠిన చర్యలు తీసుకోవాలని శైల్ శర్మ డిమాండ్ చేస్తున్నారు. ఆస్తి కోసం మానవ సంబంధాలు ఎంతగా దిగజారిపోతున్నాయో చెప్పడానికి ఈ ఘటనే ఒక నిలువుటద్దం.