ACB raids on Telangana electricity official : అవినీతి నిరోధక శాఖ (ACB) వలకు భారీ తిమింగలం చిక్కింది. అడ్డగోలుగా అనుమతులిస్తూ, అక్రమాలకు పాల్పడుతూ వందల కోట్లు కూడబెట్టారన్న ఆరోపణలపై హైదరాబాద్ విద్యుత్‌శాఖ ఏడీఈ (అసిస్టెంట్ డివిజనల్ ఇంజినీర్) అంబేడ్కర్‌ను ఏసీబీ అధికారులు అరెస్ట్ చేశారు. ఏకకాలంలో 12 చోట్ల జరిపిన మెరుపు దాడుల్లో, కళ్లు చెదిరేలా నగదు, బంగారం, ఖరీదైన ఆస్తులు బయటపడటంతో అధికారులు విస్తుపోయారు. అసలు ఈ అవినీతి అధికారి బాగోతం ఎలా బయటపడింది..? ఏసీబీ సోదాల్లో వెలుగుచూసిన ఆస్తుల విలువెంత..?
అసలేం జరిగిందంటే : హైదరాబాద్, ఇబ్రహీంబాగ్‌లో ఏడీఈగా పనిచేస్తున్న అంబేడ్కర్‌పై అవినీతి, ఆదాయానికి మించిన ఆస్తులు కలిగి ఉన్నారంటూ ఏసీబీకి పక్కా ఫిర్యాదులు అందాయి. దీంతో, కేసు నమోదు చేసిన ఏసీబీ అధికారులు, మంగళవారం తెల్లవారుజాము నుంచే రంగంలోకి దిగారు.
12 చోట్ల ఏకకాలంలో దాడులు: అంబేడ్కర్ నివాసంతో పాటు, హైదరాబాద్, రంగారెడ్డి, నల్గొండ, మెదక్ జిల్లాల్లోని ఆయన బంధువులు, స్నేహితుల ఇళ్లపై, మొత్తం 12 చోట్ల ఏకకాలంలో సోదాలు నిర్వహించారు.
బయటపడ్డ అక్రమాస్తుల చిట్టా : ఈ సోదాల్లో అధికారులు వందల కోట్ల విలువైన అక్రమాస్తులను గుర్తించారు.
రూ.2 కోట్ల నగదు: అంబేడ్కర్ బంధువు సతీష్ నివాసంలో ఏకంగా రూ.2 కోట్ల నగదును గుర్తించి స్వాధీనం చేసుకున్నారు.
బంగారం, డిపాజిట్లు: భారీగా బంగారు ఆభరణాలు, పలు బ్యాంకుల్లో డిపాజిట్లు ఉన్నట్లు గుర్తించారు.
గచ్చిబౌలిలో ఐదంతస్తుల భవనం: అత్యంత ఖరీదైన గచ్చిబౌలి ప్రాంతంలో ఓ ఐదంతస్తుల భవనం.
ఇళ్లు, ప్లాట్లు: హైదరాబాద్‌లోని ప్రధాన ప్రాంతాల్లో 6 ఇళ్లు, 3 ఓపెన్ ప్లాట్లు. వ్యవసాయ భూములు, ఫామ్‌హౌస్: సూర్యాపేట జిల్లాలో 10 ఎకరాల వ్యవసాయ భూమి, హైదరాబాద్ శివారులో వెయ్యి గజాల ఫామ్‌హౌస్, రెండు ఖరీదైన కార్లను గుర్తించారు.
“ఇష్టమొచ్చినట్లు అనుమతులు ఇస్తూ, పెద్ద మొత్తంలో అవినీతి చేసి కోట్లు సంపాదించినట్లు మాకు సమాచారం ఉంది. అందుకే సోదాలు చేస్తున్నాం. గచ్చిబౌలిలో ఖరీదైన భవనం, ఫామ్‌హౌస్‌తో పాటు అనేక ఆస్తులను గుర్తించాం. దర్యాప్తు కొనసాగుతోంది.”
– ఆనంద్, ఏసీబీ డీఎస్పీ
అరెస్ట్, రిమాండ్ : సోదాలు ముగిసిన అనంతరం, అంబేడ్కర్‌ను అరెస్ట్ చేసిన ఏసీబీ అధికారులు, వైద్య పరీక్షల అనంతరం కోర్టులో హాజరుపరిచారు. న్యాయస్థానం ఆయనకు 14 రోజుల రిమాండ్ విధించింది. విద్యుత్‌శాఖలో ఓ ఉన్నతాధికారి వద్ద ఇంతటి భారీ స్థాయిలో అక్రమాస్తులు బయటపడటం శాఖలో తీవ్ర కలకలం రేపింది.
