Dasara train ticket booking status : పండుగలొస్తున్నాయంటే చాలు, మనసు సొంతూరి వైపు పరుగులు తీస్తుంది. బంధుమిత్రులతో కలిసి ఆనందంగా గడపాలన్న ఆశ ప్రతి ఒక్కరిలోనూ ఉంటుంది. ముఖ్యంగా దసరా పండుగ వచ్చిందంటే ఆ సందడే వేరు. అయితే, ఈసారి పండుగ ఆనందానికి ప్రయాణ కష్టాలు అడ్డుపడేలా ఉన్నాయి. దసరాకు ఇంకా రెండు నెలల సమయం ఉన్నప్పటికీ, అప్పుడే రైళ్లన్నీ ప్రయాణికులతో కిటకిటలాడిపోతున్నాయి. టికెట్లు దొరకక ప్రయాణికులు లబోదిబోమంటున్నారు. ఇంత ముందుగా రిజర్వేషన్లు ఎందుకు నిండిపోతున్నాయి? ప్రత్యామ్నాయ మార్గాలు ఏంటి..? అనే మరిన్ని వివరాలు ఈ కథనంలో చూద్దాం.
పండుగ ప్రయాణాలపై రిజర్వేషన్ల ప్రభావం : ప్రతి సంవత్సరం లాగే ఈసారి కూడా దసరా పండుగకు సొంతూళ్లకు వెళ్లేవారి సంఖ్య భారీగా ఉంది. ముఖ్యంగా హైదరాబాద్, సికింద్రాబాద్, విజయవాడ, విశాఖపట్నం వంటి ప్రధాన నగరాల నుంచి పల్లెటూళ్లకు ప్రయాణాలు ఎక్కువగా ఉంటాయి. అక్టోబరు మొదటి వారంలో దసరా ఉండటంతో, చాలామంది సెప్టెంబర్ చివరి వారంలోనే తమ ప్రయాణాలను ప్లాన్ చేసుకుంటున్నారు. దీంతో సెప్టెంబర్ 28, 29, 30 తేదీల్లో ప్రయాణించే రైళ్లలో టికెట్ల కోసం తీవ్రమైన పోటీ నెలకొంది.
విద్యాసంస్థలకు సెలవులు ప్రకటించడంతో, కుటుంబ సభ్యులతో కలిసి ప్రయాణించే వారి సంఖ్య గణనీయంగా పెరిగింది. తక్కువ ఖర్చుతో కూడిన సురక్షిత ప్రయాణం కావడంతో ఎక్కువ మంది రైళ్ల వైపే మొగ్గుచూపుతారు. దీని ఫలితంగా, టికెట్లు విడుదల చేసిన కొద్ది గంటల్లోనే వెయిటింగ్ లిస్ట్ చాంతడంత అవుతోంది. కొన్ని రైళ్లలో అయితే ‘రిగ్రెట్’ (Regret) స్టేటస్ కనబడుతుండటం ప్రయాణికులను తీవ్ర నిరాశకు గురిచేస్తోంది.
ఏయే రైళ్లలో రద్దీ అధికం : సికింద్రాబాద్ నుంచి విజయవాడ, విశాఖపట్నం మీదుగా కోల్‌కతా వెళ్లే ఫలక్‌నుమా ఎక్స్‌ప్రెస్, చర్లపల్లి నుంచి సిల్చర్‌కు వెళ్లే ఎక్స్‌ప్రెస్, కోణార్క్, విశాఖ ఎక్స్‌ప్రెస్, విశాఖ ఎల్‌టీటీ, పుణె-భువనేశ్వర్, నారాయణాద్రి, శబరి వంటి ప్రధాన రైళ్లలో వెయిటింగ్ లిస్ట్ వందల్లో ఉంది. చాలా రైళ్లలో సెప్టెంబర్ నెలాఖరు వరకు ‘రిగ్రెట్’ దర్శనమిస్తోంది. దీంతో ప్రయాణికులు తమ ప్రయాణ తేదీలను, రైళ్లను సర్దుబాటు చేసుకోవాల్సిన పరిస్థితి ఏర్పడింది.
ప్రత్యామ్నాయాలపై ప్రయాణికుల దృష్టి : రైళ్లలో టికెట్లు దొరకని వారు ప్రత్యామ్నాయ మార్గాలపై దృష్టి సారిస్తున్నారు. ముఖ్యంగా తెలంగాణలో మహాలక్ష్మి పథకం కారణంగా ఆర్టీసీ బస్సుల్లో ప్రయాణించే మహిళల సంఖ్య గణనీయంగా పెరిగింది. ఈ నేపథ్యంలో దసరా రద్దీని తట్టుకోవడానికి తెలంగాణ రాష్ట్ర రోడ్డు రవాణా సంస్థ (TSRTC) ప్రత్యేక బస్సులను నడిపేందుకు సన్నాహాలు చేస్తోంది. గత ఏడాది కూడా ప్రయాణికుల రద్దీని దృష్టిలో ఉంచుకుని దక్షిణ మధ్య రైల్వే ప్రత్యేక రైళ్లను నడిపింది. ఈసారి కూడా అదే తరహాలో ప్రత్యేక రైళ్లను ప్రకటించే అవకాశం ఉందని ప్రయాణికులు ఆశిస్తున్నారు.
