Khairatabad Ganesh 2025 darshan timings : హైదరాబాద్ మహానగరానికే తలమానికమైన ఖైరతాబాద్ మహాగణపతిని కనులారా వీక్షించేందుకు భక్తజనం పోటెత్తుతోంది. పండుగ ప్రారంభమైన నాటి నుంచి లక్షలాది మంది ఆ గణనాథుని దివ్య రూపాన్ని దర్శించుకుని తరిస్తున్నారు. కానీ, ఆ కనులపండుగకు నేటితో తెరపడనుంది. ఆ బడా గణపయ్యను చూసేందుకు భక్తులకు ఇదే చివరి అవకాశం.
అర్ధరాత్రితో దర్శనాలకు స్వస్తి: ఖైరతాబాద్ వినాయకుడిని దర్శించుకోవాలనుకునే భక్తులకు ఉత్సవ కమిటీ కీలక ప్రకటన చేసింది. గురువారం, సెప్టెంబర్ 4, 2025 అర్ధరాత్రి వరకు మాత్రమే స్వామివారి దర్శనానికి అనుమతి ఉంటుందని నిర్వాహకులు స్పష్టం చేశారు. ఆ తర్వాత భక్తుల దర్శనాలను పూర్తిగా నిలిపివేయనున్నట్లు తెలిపారు. స్వామివారి దర్శనం కోసం ఇంకా వేచి చూస్తున్న భక్తులు ఈ విషయాన్ని గమనించి, వీలైనంత త్వరగా తమ దర్శనాన్ని పూర్తి చేసుకోవాలని సూచించారు.
నిమజ్జన సన్నాహాల కోసమే ఈ నిర్ణయం: దర్శనాలను ముందుగా నిలిపివేయడానికి బలమైన కారణం ఉందని నిర్వాహకులు పేర్కొన్నారు. శనివారం అత్యంత వైభవంగా జరగనున్న గణేశుని నిమజ్జన శోభాయాత్రకు సన్నాహాలు ప్రారంభించాల్సి ఉంది. ఇందులో భాగంగా..
తొలగింపు: విగ్రహం చుట్టూ ఏర్పాటు చేసిన భారీ కంచెలను తొలగించే పనులు చేపట్టనున్నారు. ఇది అత్యంత క్లిష్టమైన ప్రక్రియ కావడంతో, భక్తుల భద్రత దృష్ట్యా ఈ నిర్ణయం తీసుకున్నారు.
భారీ క్రేన్ల ఏర్పాటు: మహాగణపతిని వాహనంపైకి ఎక్కించి, హుస్సేన్‌సాగర్‌ వద్ద నిమజ్జనం చేయడానికి అవసరమైన భారీ క్రేన్లను ఏర్పాటు చేయాల్సి ఉంటుంది. ఈ పనులకు గణనీయమైన సమయం, స్థలం అవసరం.
ఈ కారణాల వల్ల, గురువారం అర్ధరాత్రి తర్వాత ఎలాంటి పరిస్థితుల్లోనూ శీఘ్ర దర్శనం గానీ, సర్వదర్శనం గానీ సాధ్యపడదని నిర్వాహకులు తేల్చిచెప్పారు. భక్తులు ఈ మార్పును అర్థం చేసుకుని, తమకు సహకరించి, గడువులోగా దర్శనం చేసుకోవాలని విజ్ఞప్తి చేశారు.
