Supreme hero sai dharamtej: మెగా కుటుంబం నుండి వచ్చిన సాయి ధరమ్ తేజ్ కొద్దిపాటి విరామం తర్వాత తన రాబోయే చిత్రాలపై దృష్టి సారించినట్లు తెలుస్తోంది. ‘విరూపాక్ష’ విజయంతో పాటు, ‘బ్రో’ సినిమాలో తన మామయ్య పవన్ కళ్యాణ్‌తో కలిసి నటించి ప్రశంసలు అందుకున్న తేజ్, ప్రస్తుతం ‘సంబరాల ఏటిగట్టు’ సినిమాతో బిజీగా ఉన్నారు.
రోహిత్ కేపీ దర్శకత్వంలో, ‘హనుమాన్’ సినిమా నిర్మించిన కె. నిరంజన్ రెడ్డి, చైతన్య రెడ్డిలు ఈ యాక్షన్ ఎంటర్‌టైనర్‌ను భారీ బడ్జెట్‌తో నిర్మిస్తున్నారు. ఈ సినిమా కోసం సాయి ధరమ్ తేజ్ పూర్తిగా తన రూపాన్ని మార్చుకున్నారు. కొత్త లుక్ ఇప్పటికే ప్రేక్షకుల్లో మంచి అంచనాలను సృష్టించింది, కంటెంట్ బలంగా ఉంటుందని అంతా భావిస్తున్నారు. ప్రస్తుతం సినిమా షూటింగ్ వేగంగా జరుగుతోంది. ఈ చిత్రం 2025లో ప్రేక్షకుల ముందుకు రానుంది. త్వరలోనే షూటింగ్ పూర్తవుతుందని నిర్మాతలు ప్లాన్ చేస్తున్నారు.
ఇదే సమయంలో, సాయి ధరమ్ తేజ్ తన తదుపరి ప్రాజెక్టులపై దృష్టి సారించారు. పలువురు దర్శకులు, నిర్మాతలతో చర్చలు జరుపుతున్నట్లు సమాచారం. ఇటీవల పీపుల్ మీడియా ఫ్యాక్టరీ బ్యానర్‌పై సినిమా చేసేందుకు ఆయన అంగీకరించినట్లు ప్రచారం జరుగుతోంది.
ఈ చిత్రానికి మాస్ మహారాజా రవితేజ నటించిన ‘టైగర్ నాగేశ్వరరావు’ ఫేమ్ వంశీ దర్శకత్వం వహించనున్నారని పుకార్లు షికారు చేస్తున్నాయి. ఇప్పటికే చర్చలు పూర్తయ్యాయని, త్వరలోనే అధికారిక ప్రకటన వెలువడే అవకాశం ఉందని తెలుస్తోంది. ఈ వార్త ప్రస్తుతం నెట్టింట వైరల్‌గా మారింది.
అయితే, దర్శకుడు వంశీ ట్రాక్ రికార్డుపై నెటిజన్లు చర్చించుకుంటున్నారు. ఇప్పటి వరకు ఆయన మూడు చిత్రాలకు దర్శకత్వం వహించారు. 2015లో ‘దొంగాట’, 2017లో ‘కిట్టు ఉన్నాడు జాగ్రత్త’ సినిమాలు ఆశించిన స్థాయిలో ఆడలేదు. రెండేళ్ల క్రితం వచ్చిన రవితేజతో తీసిన ‘టైగర్ నాగేశ్వరరావు’ కూడా పెద్దగా విజయం సాధించలేకపోయింది. ఈ నేపథ్యంలో, హిట్ లేని దర్శకుడితో సాయి దుర్గ తేజ్ సినిమా చేయడం పట్ల పలువురు ఆశ్చర్యం వ్యక్తం చేస్తున్నారు. మరి ఈ కాంబినేషన్ ఎలా ఉంటుందో వేచి చూడాలి.
