నవ మాసాలు మోసి పేగు తెంచుకొని మరీ జన్మనిచ్చిన బిడ్డపై అమ్మకు ఎంత ప్రేమ ఉంటుందో మాటల్లో చెప్పడం కొంచెం కష్టమే తన ప్రాణాన్నే పణంగా పెట్టి జీవం పోసిన ఆ బిడ్డను కంటికి రెప్పలా కాపాడుకుంటుంది అలాంటి బిడ్డ దూరమైతే ఆ మాతృ వేదన మనుషుల్లోనే కాదు మూగజీవుల్లోనూ ఉంటుంది.
తల్లి వానరం పడుతున్న బాధను అర్థం చేసుకొని అండగా నిలిచిన ఆ దండు చూపిన తెగువ నిజంగా మానవులకు ఓ మేలుకొలుపే. గార్ల మండల పరిధిలోని సీతంపేట గ్రామ శివారులో పంట చేల నుంచి కొన్ని వానరాలు రోడ్డు దాటి వెళుతుండగా.. అందులో ఓ తల్లి కోతి, పిల్ల కోతి కలిసి రోడ్డు దాటుతున్న సమయంలో వాహనాలు వేగంగా వస్తుండగా మిగతా కోతుల్లాగానే తల్లి కోతి వేగంగా దాటేసింది. అయితే ఈ క్రమంలో పిల్ల కోతిని ప్రమాదవశాత్తు అటుగా వెళుతున్న గుర్తు తెలియని వాహనం ఢీ కొట్టింది. ఈ ప్రమాదంలో ఆ కోతి పిల్ల అక్కడికక్కడే ప్రాణాలు విడిచింది.
దీంతో నడిరోడ్డుపై పడి ఉన్న కోతి పిల్లను చూసి ఆ తల్లి వానరం గుండె తరుక్కుపోయింది. తన బిడ్డ చనిపోయిందన్న విషయాన్ని జీర్ణించుకోలేక రోడ్డు మీదికి పక్కనున్న చెట్లలోకి అదే పనిగా తిరుగుతూ తన బిడ్డ మృత దేహం చుట్టూ తచ్చాడుతూ, తన మాతృ వేదనను వెళ్లగక్కింది. అప్పటికే ముందుకు సాగిన కోతులు ఈ దృశ్యాన్ని చూసి వెనక్కి తిరిగాయి.
దండు మొత్తం కదిలి ఘటనా స్థలికి చేరుకొని రోడ్డుపైకి చేరాయి. అటుగా వెళ్తున్న వాహనదారులకు వానర గుంపు చుక్కలు చూపించాయి. తన కళ్ల ముందే బిడ్డ చనిపోవటాన్ని జీర్ణించుకోలేక ఆ తల్లి వానరం పడిన బాధ, ఆ తల్లి కోతిని చూసి తనకు అండగా నిలిచిన దండును చూసి అక్కడున్న జనాలు నివ్వెరపోయారు. మనుషుల్లో కూడా చూడని ఇంతటి ఎమోషన్‌ వానరాల్లో చూసి భావోద్వేగానికి లోనయ్యారు.