Jai Hanuman| ఈ ఏడాది సంక్రాంతి పండుగ కానుకగా విడుదలైన ‘హనుమాన్'(Hanuman) మూవీ ఇండియన్ బాక్సాఫీస్ వద్ద ఘన విజయం సాధించిన సంగతి తెలిసిందే. దీనికి కొనసాగింపుగా ‘జై హనుమాన్’ సినిమా తీయనున్నట్లు దర్శకుడు ప్రశాంత్ వర్మ(Prasanth varma) ప్రకటించిన విషయం విధితమే. ‘శ్రీరాముడికి హనుమంతుడు ఇచ్చిన మాటేమిటి?’ అనే ప్రశ్నకు సమాధానంగా ‘జై హనుమాన్’ (jai hanuman) రూపుదిద్దుకోనుంది. ‘హను-మాన్‌’కి మించి వందరెట్లు భారీ స్థాయిలో ‘జై హనుమాన్’ ఉంటుందని దర్శకుడు ప్రశాంత్ ఇప్పటికే ప్రకటించారు. హనుమాన్ చిత్రంలో హీరోగా నటించిన తేజ సజ్జా.. సీక్వెల్‌లో హీరో కాదని, సీక్వెల్‌లోనూ అతడు హనుమంతు పాత్రలో కనిపిస్తాడని తెలిపారు. కానీ హనుమాన్ పాత్రను స్టార్ హీరో చేస్తారని స్పష్టంచేశారు.
తాజాగా ఈ మూవీకి సంబంధించిన ఆసక్తికర విషయాన్ని మూవీ మేకర్స్ ప్రకటించారు. ‘జై హనుమాన్’ ఫస్ట్‌లుక్‌ను అక్టోబరు 30న విడుదల చేయనున్నట్లు చిత్ర నిర్మాణ సంస్థ మైత్రీ మూవీ మేకర్స్ వెల్లడించింది. ప్రశాంత్ వర్మ సినిమాటిక్ యూనివర్స్‌లో(PVCU) భాగంగా రూపొందుతున్న ఈ మూవీలో హనుమంతుడి పాత్రను ఎవరు పోషిస్తారు? అనే ఆసక్తి అభిమానుల్లో నెలకొంది. ఇందుకోసం దక్షిణాది భాషలకు చెందిన పలువురు స్టార్ హీరో పేర్లు వినిపిస్తున్నాయి. తాజాగా ‘కాంతారా’ ఫేమ్ రిషభ్‌ శెట్టి పేరు తెరపైకి వచ్చింది. ఇక రేపు ఈ సినిమా ఫస్ట్ లుక్‌ను ప్రకటించనున్నామని చిత్ర బృందం ప్రకటించిన నేపథ్యంలో.. ఈ పాత్రలో ఏ హీరో నటిస్తారనే ఉత్కంఠకు ముగింపు పడనుంది.
ప్రశాంత్ వర్మ సినిమాటిక్ యూనివర్స్‌లో భాగంగా ఈ మూవీతో పాటు, ‘అధీర’, ‘మహాకాళి’ చిత్రాలు కూడా విడుదల కానున్నాయి. ఇటీవల దసరా పండుగ సందర్భంగా ‘మహాకాళి’ చిత్రం మోషన్ పోస్టర్ విడుదల చేశారు. ఈ సినిమాలో స్టార్ హీరోయిన్ నటిస్తుందని సమాచారం. మరోవైపు నందమూరి నట వారసుడు, బాలకృష్ణ తనయుడు మోక్షజ్ఞ పరిచయ చిత్రానికీ కూడా ప్రశాంత్ వర్మ దర్శకత్వం వహిస్తున్నారు. భారీ బడ్జెట్‌తో తెరకెక్కనున్న ఈ సినిమా వచ్చే ఏడాది విడుదల కానుంది. ఈ సినిమా కోసం నందమూరి అభిమానులు ఎంతో ఆసక్తిగా ఎదురుచూస్తున్నారు.
